Luk 7 | GAM | STEP | Jisas kandja embe dje una awo kere, er dumo Kaperneam pi.

Luke 7

Rom ami iwa kerman ta moi ge yene boiye iwa ta ke toi Jisas wo i gun woro awi

(Matyu 8.5-13)

1 Jisas kandja embe dje una awo kere, er dumo Kaperneam pi. 2 Ami iwa kerman ta moi ge, yene boiye una ta moi. Une wopake pille awi ba, boiye ge ke kerman toi, goya pai. 3 Jisas kogo ye wani mal ami iwa kerman ge pille, Juda una kerman dje woro embe dji, ye Jisas moro al po djineke, na boina ke toi paro ge wo i gun woro aunda we dji. 4 Djika kambono Jisas moi al po kandja yembe ye dje embe dji, nono lotu numb yero ge une boll take nono awi. Nono Juda una mormon ge, une nono ye wopake ye aundo. Une embe yendo pille, une boiye iwa ke toi paro ge, ni wo i gun woro aumben we dji. 6 Kambono kandja embe djimaka, Jisas kambono boll aike er pi.

Po numb al manda pumaka, ami iwa ge yene ye noi una kandja sigye dje worika, kambono Jisas moi al po embe dji, ami iwa ge kandja embe djindo, na nanam wo ni boll kandja dje auno ge kune nayendo. Ni iwa kerman moren. Ni na numbna al womben ge kune nayendo. Ni yenden mal, na embe yendo. Na ami iwa kerman kandja djindo mal na pille yendo. Na ami merke kantau yendo ge, na kandja djindo mal pille yenj. Ta moro al, ni er piye! djindo mal une pille er pundo. Ta moro al, ni er we! djindo mal une er wondo. Na boina una mor al, ni kogo embe yeye! djindo mal une pille yendo. Na embe yendo ge, ni kandja kiwa djimbenka, na boina iwa ke toi paro ge pora djinda we dji.

9 Une ge kandja embe djika, Jisas pille aya dje kane ake to una merke aike pi una moi al embe dji, na kandja dje ye aundo, na Israel una boll aike wando ge kambono une pillgi kerman djindo mal embe nadjinj we dji. 10 Jisas kandja embe djika, kandja sigye dje wori woi una ge yenekne er yem po kani, ami boiye iwa ke toi pai ge alla kiwa moi, ke pai pora dji.

Ana kangill ta wariye goi

11 Are Jisas yene kogoye una ne, una merke boll aike molo er dumo Nain we dji yei al pi. 12 Pumaka Jisas gull kond djillake al manda po moi. Ana kangill ta wariye taimane ta moi ge goi, kambono tublo i er bon dje iumaka, dumo Nain una merke aike woi. 13 Womaka Jisas ana kangill ge kane wandill golo, ni kimb naye! dji. 14 Une po palbam ambika, tublo iwi una kiye dje kake molmaka, Jisas embe dji, womba ni pa moren ge na kandja dje ni aundo, ni agle! dji. 15 Djika womba goi ge, alla aglo ami dje pagle kandja djika, Jisas womba ge i me awi. 16 Una porapora moi ge kand goi. God kandjiye amblo pla woro embe dji, propet kerman nono mopin al woi moro, God unakye moi al wo amblo pille dje aundo we dji. 17 Djimaka distrik Judia una porapora moi ge ne, manda moi una kandja dje wai djimaka, Jisas womba i gun wori mal, una porapora moi ge pi pora dji.

Jon kogoye una soka dje worika er Jisas moi al pupill

(Matyu 11.2-19)

18 Jisas wal porapora yei mal Jon kogoye una pille wo une moi al kandja dje awi. 19 Jon pille yene kogoye una soka dje woro embe dji, ye Jisas moro al po embe djimbell, God iwa ta dje worno we dji ge, ni wale won mo no una gun ta wonda dje tau mopon ne djise! dji. 20 Djika soka Jisas moi al po embe djipill, no Jon dje wori wopill. Une embe djindo, God iwa ta dje worno wonda we dji ge ni wale wonden mo, no una gun ta wonda dje tau mopon ne? dji we djipill. 21 Kune ge una merke ke kayekaye toi moi ge, Jisas po ye wopake ye awo, una kum ke tukne al moi ge une po i woro, una merke nalene emill yei ge une po amblo poi dje awi. 22 Embe ye molo, Jisas Jon kogoye una mopill al embe dji, una nalene emill yei una nalene alla kaninj. Una kakene ke yei moi ge alla kamblo er pinj. Una kenj toi moi ge kiwa mor. Una kamallne dall toi ge kandja pir. Wal kane nanonj una ge, God kandjiye wopake paro mal pille mor. Na embe yendo ge una kane nomane soka napai dal wopake moye, ye po Jon moro al embe djise! dji.

24 Djika Jon dje wori wopill iwa soka er yem pupill. Pupillka, Jisas una merke moi al Jon pille embe dji, ye asa dumo wapra yei al pi ge, ye po wal naral wal kanbon dje pi ne? Ye golo ngab kam kopo abi ge kanbon dje pi mo? Ye wal naral wal kanbon dje pi ne? 25 Ye una konkunom wopake woro moye kanbon dje pi mo? Ge man. Una embe mal mor ge una king numbine al mor. 26 Ye wal naral wal kanbon dje pi ne? Ye una propet ta moi al kanbon dje pi mo? Ge wale. Na kandja dje ye aundo, una propet porapora mor ge Jon kambono kamblo aundo. 27 Asa God kandja dji pepa boi mal ge Jon pille boi. Embe dji, ni pille! Na iwa ta dje wornaka, une er wekle po ni womben al, kondwe amblokun ye moya we dji. 28 Na kandja kaima dje ye aundo, makimb una mor ge Jon porapora kamblo aundo, une kandjiye kerman paro. Ba alla, God dumoye kantau yendo al una kandjine napanda ulle al mor ge, Jon kamblo awinj we dji.

29 Jisas kandja embe djika, ku takis i una ne, una merke embe dji, God kogo yendo ge dume dje yendo we dji. Kandja embe dji ge Jon ga nu pagle awi pille dji. 30 Ba Parisi una ne, God lo dje awi una man dji, Jon no nu pagle naunda we dji. Kandja embe dji ge God, ye embe yeme dji mal, kambono mop awo nayei. 31 Jisas embe dji, ye una mor ge namba mal mor? Na kandja namba mal djino? Ye embe mal mor. 32 Una makai to moi al womba bill soka to moi. Bill ta ye molo embe dji, no pupnume topin ba, ye gollang nadji. No kimb gollang yepin ba, ye kimb nayei.

33 Womba yei mal ge, Jon wo nu pagle awo, kwa nano, nu wain nano yeika, ye une kandjiye amblo, kum ke tukye al moro we dji. 34 Alla Una Wombe wo kwa no, nu wain no yeika, ye une kandjiye amblo embe dji, une kwa merke no, nu wain merke no, una ku takis inj una ne, ke yenj una boll aike nondo we dji. 35 Ba nono kanmon, una nomane wopake pai una singare yene ge wal kaima paro dje kanmon we dji.

Ana ta wo Jisas kake al kopong yei

(Matyu 26.6-13 ne, Mak 14.3-9 ne, Jon 12.1-8)

36 Parisi iwa ta Jisas kwa aike namboll we dji. Jisas er iwa ge numbiye al pika una pende aike moi. Kwa nambon dje ye molmaka, 37 una embe dji, Jisas woi Parisi iwa numbiye al moro we dji. Singare ke ye wani ana ta po kopong botol ta mirang wopake yei una iwi. 38 Ana ge wo Jisas mopye al aglo, kake al molo kimb yei. Yene kimb nuye yage Jisas kake al toika, ngambale ene momo moi ge une i kill gulo, Jisas kake al amblo, kopong ye, djembon kanan to moi.

39 Parisi iwa Jisas dje i numog wori iwa ge une embe dje pi, Jisas ni propet kaima mon dal, ana kaken abro ge singare ke yei ana moro dje kanben we dje pi.

40 Ba Jisas embe dji, Saimon na ni kandja ta dje auno we dji. Saimon, tisa, djiye! dji. 41 Jisas embe dji, kune ge iwa soka ye molo iwa ta moi al po ku dje ipill. Ta K100 dje ika ta K10 dje ika yepill. 42 Ba soka awo yem worbell ku nayei. Ku ne wo embe dji, pora, kerse! dji. Iwa soka mopill ge, iwa ne mal ye molo iwa kerman kane wopake kaima piya ne? dji. 43 Saimon embe dji, na pro ku kerman i iwa ge kane wopake yenda we dji. Jisas embe dji, ni kandja kune djinden we dji. 44 Jisas kandja embe dje kere, une kane ake to ana ge kanmolo Saimon moi al embe dji, ana moro ge ni kanden mo? Na ni numbin al woll ge, na kakena was yeno dje nu kolo nawin. Ba ana ge na kakena al kimb nuye ye moglo, ngambale ene i kill gulo wordo. 45 Na numog woll ge ni na djembon to nawin. Ba ana ge na kakena al djembon kanan to molo ipi ipon moro. 46 Ni na ngambalna al kopong nayen. Ba ana ge na kakena al kopong yendo. 47 Une embe yendo ge na kandja dje ni aundo, ana ge na we dje wopake kaima kani pille, une singare ke merke ye wani ge God kere awi pora djindo. Singare ke yepall yenj una mor ge, God kere aundo ba, ga God we dje wopake kaninj ge kembis ta kaninj we dji. 48 Jisas ana moi al embe dji, ni ke ye wanin ge na kere aundo we dji. 49 Djika kwa aike no moi una yenekne kandja dje pille embe dji, iwa ge ne mal molo una ke yenj mal kere aundo ne? God kere aunda ge kune yendo ba, une kere aunda ge kune nayendo we dji. 50 Djimaka Jisas ana moi al embe dji, ni pillgi djin pille, God ni i yem wordo. Ni ellin tukin arngan yenda wanmopen we dji.